Edicioni i 110-të i Turit të Flandrës nuk përfundoi vetëm me fitoren solo të fenomenit slloven Tadej Pogaçar. Prokuroria e Flandrës Lindore ka hapur një hetim ndaj 54 çiklistëve që kaluan me semafor të kuq në një kalim hekurudhor gjatë garës. Mes tyre ishin pikërisht Pogaçar dhe kampioni olimpik Remko Evenepoel, i cili u rendit i treti në finishin e garës belge.
ÇFARË NDODHI – Kur grupi po kalonte nëpër qytetin Wichelen, rreth 212 kilometra nga finishi, semafori i një kalimi hekurudhor u bë i kuq. Megjithatë, përpara se të mbylleshin barrierat, 54 çiklistë kaluan shinat për të mos humbur kontaktin me grupin e arratisur. Pjesa tjetër e pelotonit u ndal në mënyrë të rregullt. Duke njoftuar hapjen e hetimit, prokuroria e Flandrës Lindore sqaroi se “kalimi me të kuqe në një kalim hekurudhor përbën një shkelje të shkallës së katërt, kategorinë më të rëndë të kodit rrugor, e cila mund të sjellë pasoja shumë serioze”. Të përfshirët rrezikojnë një gjobë deri në 5.000 euro dhe pezullimin e patentës për të paktën tetë ditë. Nga ana tjetër, rregullorja e Unionit Ndërkombëtar të Çiklizmit (UCI) parashikon për raste të tilla skualifikim, pezullim deri në një muaj dhe gjoba nga 200 deri në 5.000 franga zvicerane. Teorikisht, Pogaçar mund të humbasë edhe fitoren e Turit të Flandrës në tavolinë në favor të holandezit Mathjë van der Poel, i cili përfundoi i dyti, por një vendim i tillë duket i vështirë që të merret, pasi gjatë garës juria nuk ndërhyri sepse u konsiderua e rrezikshme ndalimi i të gjithë grupit me shpejtësi të lartë.
SANKSIONE TË TJERA – Sikur të mos mjaftonte kjo, çiklisti slloven u gjobit edhe për hedhje mbeturinash jashtë zonës së lejuar. UCI i vendosi kampionit të botës një gjobë prej 500 frangash zvicerane (rreth 540 euro) dhe një zbritje prej 25 pikësh në renditjen UCI. Kjo ka pak ndikim për Pogaçarin, duke qenë se ai ka një avantazh prej 4750 pikësh ndaj Jonas Vingegard, i dyti me 6885 pikë. Edhe Evenepoel u gjobit me 200 franga zvicerane (rreth 215 euro) për të ashtuquajturën “sticky bottle”. Çiklisti belg përfitoi në mënyrë të parregullt nga makina e ekipit gjatë furnizimit, duke mbajtur shishen për më gjatë sesa lejohet. Pasoja pati edhe për drejtorin sportiv të Red BullBora-Hansgrohe, Sven Vanthourenhout, i cili do të paguajë 500 franga zvicerane.
KOMENTI I POGAÇARIT – Në fund të garës, slloveni u shpreh kështu për incidentin: “Papritur, tre persona dolën në mes të rrugës dhe na thanë të ndaleshim. Por si mund të ndalesh brenda një sekonde? Duhej ta kishin bërë më herët, jo dhjetë metra para barrierës. Madje mendova se ishin protestues dhe se po ndodhte diçka e çuditshme”. Objektivi i radhës sezonal është ParisRube, e planifikuar për të dielën më datë 12 prill. Është e vetmja klasike monument që mungon në palmaresin e tij të pasur dhe synimi është të përmirësojë vendin e dytë të vitit të kaluar, kur u penalizua nga një rrëzim 38 kilometra nga fundi. “Garat e pakta ku kam marrë pjesë këtë sezon kanë shkuar në mënyrë perfekte, kështu që motivimi është i lartë, por nuk ndiej asnjë presion. Do të kënaqem pavarësisht gjithçkaje”, përfundoi çiklisti slloven i skuadrës së Emirateve të Bashkuara Arabe.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
