Eduart Rroca u dëmtua në gju në gushtin e shkuar dhe u detyrua që të bëj terapi intensive. Pas largimit të Abazajt e Bregut, dëmtimi i Rrocës i ka prishur shumë punë gjirokastritëve në javët e para, të cilët janë detyruar që të bëjnë pa “trurin” e mesfushës.
Pa Rrocën, Jakovljeviçin apo dhe Aleksin, bluzinjtë e kanë nisur në mënyrën më të keqe të mundshme sezonin, ndërsa me ardhjen e trajnerit Gentian Mezani, skuadra është kompaktësuar disi. Por, sot, në testin me Bylisin ka luajtur 20 minuta edhe mesfushori Eduard Rroca.
Rroca është një nga lojtarët me eksperiencë të skuadrës bluzi, ndërsa në një prononcim për “Vipsport.al”, ka pohuar: “Mezi e kam pritur këtë moment, luajta 20 minuta ndaj Bylisit. Isha në formën time më të mirë kur u dëmtova, por tashmë duhet që të shohim përpara. Skuadra po rritet dhe të mos harrojmë që ka pasur shumë problem dëmtimesh.”
“Megjithatë, tashmë t’i marrim ndeshjet me radhë, pasi javën që vjen luajmë me Partizanin. Besoj se do të jem në atë ndeshje, pasi edhe kjo periudhë ndërprerje më ndihmon që të rikuperohem edhe më shumë. Kam bindjen se skuadra do të lërë shpejt zonën e rrezikut”, – tha Eduart Rroca, një nga kualitetet e skuadrës gjirokastrite.
