I ftuar në emisionin “Studio e Hapur” në News 24, në lidhje me rendin dhe sigurinë në vend, gazetari Artan Hoxha flet për grupet kriminale në Shqipëri.
Referuar rastit të Moisi Habilajt, ai bën një analizë të grupit kriminal që operon në Shqipërinë e jugut, për trafikun e drogës.
“Kreu i grupit kriminal është nga zona e Skraparit, Vlorë, Tepelenë, Mallakastër dhe Gjirokastër, ndryshe quhet dhe grupi i “Rrjedhës së Poshtme të Vjosës” ose “Labëria”. Janë 5 grupe që kordinojnë veprimet dhe këtu bën pjesë rasti i Habilajt. Grupet kriminale nuk kanë bindje politike, janë në dispozicion të atij që investon tek ta, pasi ata kanë mbështetje të fortë financiare dhe kjo i vjen nga lartë”, ka deklaruar Hoxha.
Në vijim gazetari deklaroi se goditja e grupeve është shumë e vështirë, nisur nga mënyra se si mundohen t’i kapin dhe sa publike i bëjnë detajet.
“Ata nuk goditen me fushatë siç tentoi ta bëjë drejtoi i përgjithshëm i policisë. Nëse ka një frymë të mirë, që duhet të jetë, duhet të bëjnë pa bujë dhe të na japin rezultatin”.
