Përfaqësues të kompanisë Shell kanë thënë se parku kombëtar I Zagorisë nuk do të dëmtohet nga kërkimet për naftë. Drejtori për Shqipërinë tha se pajisjet që do përdoren nuk kanë impakt në mjedis ndërsa shtoi se zona e mbrojtur nuk do të preket. Ndërkaq akademia e shkencave organizoi një forum me ambientalistët që shprehën shqetësim për projektin. Plani për kërkime nafte është pritur me protesta nga banorët e zonës.
Parku Kombëtar i Zagorisë nuk do të dëmtohet nga kërkimet për zonën naftëmbajtëse që do të realizohen prej kompanisë SHEll. Drejtori i Subjektit për Shqipërinë Rohan DSouza tha se gjithçka do të realizohet në territoret përreth zonës së mbrojtur me pajisje të sofistikuara që nuk sjellin impakt në ambient.
Rohan DSouza: Ekziston një paqartësi në publik për faktin se ne si kompani do të bëjmë një vëzhgim sizmik të nëntokës duke e fotografuar. Fillimisht do të shohim gjendjen e nëntokës përmes fotografive, për të analizuar më pas me ekspertë të fushës nëse në nëntokën e Zagorisë ka naftë apo gaz. Studimi sizmik parashikon përdorimin e disa pajisjeve që quhen gjeofone, hapjen e vrimave për të krijuar energjinë e duhur dhe për të fotografuar pjesën e nëndheshme. Edhe nëse konstatohet se në nëntokën e Zagorisë ka naftë ose gaz, ne kurrsesi nuk do të ndërhyjmë në zonën e mbrojtur. Testimi mund të bëhet në zonat përreth pa dëmtuar ambientin. Ne si kompani garantojmë se nuk do të ketë dëmtime të ambientit, natyrës apo ujërave të nëntokës.
Ndërkohë, Akademia e Shkencave ka hapur dyert për ambientalistët, të cilët kanë shprehur shqetësimet e tyre për dëmtimin e natyrës shqiptare nga ndërtimet e Hec-eve apo ndërhyrjeve në zonat e mbrojtura siç është Zagoria.
“Ka një strategji, këtu dot ë zhvillojmë këtë industri, këtu naftën, këtu turizmin, këtu bujqësinë”
Mero Baze: As ndonjë eksperti i nivelit të ulët mund të bëjë një studim mjedisi për Zagorinë në atë cektësi dhe në atë papërgjegjshmëri.
Gjergj Bojaxhi: Duhet të ketë disa zona në Shqipëri, si Zagoria, Valbona, Vjosa që duhet të kenë një tjetër lloj zhvillimid dhe përqasje ekonomike.
Në të njëjtën kohë, kryeministri Edi Rama ka reaguar përmes rrjeteve sociale duke e cilësuar marrëveshjen me kompaninë SHELL si një lajm të mirë për ekonominë. Ai thekson se në asnjë rast nuk do të lejohet të kërkohet naftë në zona të mbrojtura siç është Zagoria.
Lajmi ka shqetësuar dhe banorët të cilët kanë protestuar në mbrojtje të parkut natyror, duke u shprehur se nuk mund të ketë në të njëjtën kohë dhe turizëm dhe kërkim për naftë.
