Ish-ministrja e Kulturës dhe deputetja e Gjirokastrës, Mirela Kumbaro bën një thirrje që këtë verë të bëhen pushimet brenda vendit, në mënyrë që të ndihmohet sektori i turizmit, i cili është një nga më të goditurit nga pandemia e Covid-19.
“Kjo krizë do të kalojë, dhe muajt që vijnë do të jenë të vështirë për t’u rimëkëmbur. Turizmi dhe kultura do të dalin të lënduar rëndë, prandaj, mbështetja ndaj trashëgimisë kulturore dhe turizmit do të jetë shumë shpejt një domosdoshmëri! Tani që kemi kohë të mendohemi, ta ndajmë mendjen secili prej nesh, aq sa mundet, e të zotohemi që kur të ketë mbaruar kjo luftë, do të zbulojmë e rizbulojmë natyrën e kulturën e Shqipërisë, muzeumet, sitet arkeologjike, qendrat historike, mrekullitë natyrore, fshatrat e qytetet shqiptare. Jo vetem do të kuptojmë më mirë pas kësaj që po na ndodh se sa të bukur janë, por është ndihma që mund të japë secili për të mos ta lënë të fiket drita e turizmit që bashkë ndezëm në këto vite dhe që është jetike pë ekonominë e vendit.
#KeteVereDoTeVizitojShqiperine. #TeShpetojmeTurizmin”, shkruan Kumbaro në faqen e saj në Facebook teksa publikon edhe një kolazh fotosh nga qarku Gjirokastër dhe jo vetëm.
