Aktorja legjendare Kim Novak ka shprehur hapur pakënaqësinë e saj për përzgjedhjen e Sydney Sweeney në rolin e saj në filmin biografik “Scandalous!”.
Në një intervistë të fundit për The Times, Novak, tashmë 93 vjeçe, e cilësoi këtë vendim si “plotësisht të gabuar”, duke theksuar se nuk do ta kishte miratuar kurrë këtë casting. Filmi pritet të trajtojë historinë reale të romancës së saj në vitet ’50 me ikonën e muzikës Sammy Davis Jr., një lidhje që në projekt do të portretizohet nga aktori David Jonsson.
Novak u shpreh kritike ndaj mënyrës se si Sweeney përshtatet me rolin, duke komentuar edhe për paraqitjen e saj fizike. Sipas saj, aktorja e njohur nga seriali “Euphoria” “duket shumë sensuale gjatë gjithë kohës”, gjë që, sipas Novak, rrezikon ta zhvendosë fokusin e filmit drejt aspektit seksual të historisë.
Aktorja veterane theksoi se marrëdhënia e saj me Davis Jr. ishte shumë më tepër sesa thjesht fizike, duke nënvizuar se ata ndanin shumë gjëra të përbashkëta dhe një lidhje të thellë emocionale.
Nga ana tjetër, Sweeney ka shprehur më herët entuziazmin për këtë rol, duke e cilësuar Novak si një frymëzim të madh. Ajo është shprehur se ndihet e nderuar që do ta sjellë në ekran historinë e saj dhe se identifikohet me sfidat që Novak ka përjetuar në Hollywood, veçanërisht në lidhje me kontrollin e imazhit dhe jetën private.
Filmi “Scandalous!” pritet të jetë debutimi regjisorial i aktorit Colman Domingo.
