Bashkia Gjirokastër vijon me shpërndarjen e ndihmave për familjet në nevojë dhe pensionistët që jetojnë të vetmuar. Kryebashkiaku Flamur Golemi dhe prefekti Astrit Aliaj, kanë shkuar gjithashtu edhe tek një familje në Lunxhëri, djali i së cilës është me mision ushtarak në Afganistan. Ai quhet Spiro Krisafi.
Postimi i Golemit
E nisim ditën tek familja Krisafi në fshatin Kakoz të Lunxhërisë. Djali i saj shërben aktualisht në misionin ushtarak të forcave shqiptare në Afganistan. Në front ai, në front edhe ne ketej me virusin famëkeq që kërkon të na godasë pabesisht. Por gjithë sakrifica që kemi bërë për javë të tëra dhe durimi i hekurt që kemi treguar, jam i bindur që do të shpërblehet. Ne po e fitojmë këtë betejë falë secilit prej jush që ka demonstruar një shembull të pashoq force e kurajo. Ringjallja e Krishtit dhe kremtimi i Pashkës janë një ogur i mirë për të filluar pak e nga pak rikthimin në normalitet, janë një shpresë e madhe se skenarët e rrezikshëm që na kanoseshin do të qëndrojnë larg nesh. Bashkia Gjirokastër do të vijojë të jetë pranë familjeve në nevojë siç ka bërë që prej ditës së parë të kësaj emergjence. #TiNukDoJeshKurrëVetëm🤝🇦🇱🙏
