Prefekti i Vlorës, Vangjel Tavo ka dalë pas një ore nga Prokuroria e Posaçme. Në një deklaratë të shkurtër për gazetarët ai i tha se ishte në SPAK për një kallëzim që kishte bërë para 3 vitesh.
“Isha si persona në dijeni për një kallëzim. U pyeta për një kallëzim që kam bërë në 2021”, ka thënë Tavo shkurtimisht për mediat.
Kujtojmë që SPAK po heton edhe një aktivitet lobimi të LSI-së në SHBA, e dyshuar me para të padeklaraura. Në materialin e referuar në SPAK janë kallëzuar Ilir Meta, bashkëshortja e tij Monika Kryemadhi, ish deputeti Vangjel Tavo dhe Iraklis T. Fidetzis, administrator i kompanisë Dorelita Limited me seli në Qipro.
Personi që ka lidhur Ilir Metën me administratorin e kompanisë offshore Dorelita Limited, Iraklis T. Fidetzis dyshohet se është Vangjel Tavo, ish deputet i LSI-së. Roli i Tavos është konfirmuar nga vetë LSI-ja gjatë një reagimi për gazetën amerikane Mother Jones, e cila në 25 Prill 2018 publikoi një artikull për lobimet e LSI-së në SHBA. “LSI mohon çdo lidhje me Dorelitën. Një zëdhënës i partisë tha se kishte “zero kontakte me kompaninë dhe zero njohuri për” kompaninë. Zëdhënësi vuri në dukje se një anëtar i shquar i partisë, Vangjel Tavo, e kishte lidhur partinë me Fidetzis dhe se më vonë Tavo miratoi pagesën prej 15,000 dollarësh nga LSI për McKeon Group…”, thuhet në artikull.
