Konfirmohen dy rastet e para me koronavirus në Shqipëri. Ministria e Shëndetësisë, ka bërë të ditur se, gjendja e dy të prekurve babë e bir që kanë udhëtuar nga Firence në Tiranë është e stabilizuar dhe nuk paraqesin komplikacione.
“Babë e bir, 54 vjeç dhe 28 vjeç kanë qëndruar disa ditë në Firence dhe kanë udhëtuar në rrugë tokësore drejt Tiranës, nëpërmjet pikës së Hanit të Hotit, me makinë personale. Menjëherë pas shfaqjes së shenjave klinike dhe lajmërimit të Urgjencës Kombëtare në nr. 127 iu janë marrë mostrat, të cilat u konfirmuan mbrëmjen e sotme nga laboratori i virologjisë në ISHP. Dy rastet e konfirmuara me COVID-19 janë në gjendje të stabilizuar dhe po trajtohen në Spitalin Infektiv. Ndërkohë strukturat e shëndetit publik po realizojnë hetimin epidemiologjik dhe marrjen e mostrave të kontakteve”, thuhet në njoftimin e Ministrisë.
MSHMS u bën thirrje qytetarëve të ruajnë qetësinë dhe të zbatojnë rigorozisht rregullat e higjenës, sipas njoftimeve që janë bërë gjatë gjithë kësaj kohe. Kurse kryeministri Edi Rama deklaroi në mbledhjen e qeverisë se djali ka infektuar babanë.
“Siç është bërë e ditur nga ministria e Shëndetësisë, laboratori ka konfirmuar dy raste me koronavirus. Bëhet fjalë për një rast të importuar nga Firence. Një i ri 28-vjeçar, që ka udhëtuar me automjetin e tij dhe ka hyrë nga Hani i Hotit, duke infektuar edhe babanë. Strukturat shëndetësore po trajtojnë të dy të prekurit. Ministrja e Shëndetësisë do të informojë më tej lidhur me masat e marra”.
