Vendet e Ballkanit Perëndimor i përkasin Bashkimit Europian dhe kjo perspektivë e tij, e shprehur edhe në Deklaratën e Selanikut të vitit 2003, duhet të mbahet gjallë, deklaroi kryeministri grek, Kyriakos Mitsotakis në samitin BE-Ballkani Perëndimor.
Fillimisht i planifikuar të zhvillohej në Zagreb, samiti u mbajt me video konferencë për shkak të pandemisë COVID-19.
“Dokumenti i Selanikut është akoma i vlefshëm, 17 vjet më vonë, ndërsa për Greqinë integrimi evropian i Ballkanit Perëndimor është një zgjedhje strategjike”, theksoi Mitsotakis duke kujtuar se ishte Greqia ajo që filloi dhe mbështeti për herë të parë integrimin e Ballkanit Perëndimor në BE.
Mitsotakis i bëri thirrje Europës që të përmbushë detyrimet e saj në administrimin e krizës së migracionit.
“Greqia ka një ngarkesë të madhe në çështjen e migracionit. Ne e bëmë detyrën tonë dhe presim që të tjerët të bëjnë të njëjtën gjë”, tha kryeministri grek.
