Tre ditë më parë, Ervin Karamuço ekspert i kriminalistikës bëri publik në llogarinë e tij në Facebook, rastin e një personazhi “VIP” që sipas tij frekuenton rregullisht poligonëte qitjes. Ky personazh shumë i njohur i showbizz-it, thotë Karamuço, vendos mbi shënjestër fotografinë e vjehrrës së saj.
I ftuar në Abc Live me Sibora Bitrin eksperti i kriminalistikës nuk e bëri të ditur emrin e personazhit në fjalë por theksoi se ai që është për t’u shqetësuar në këtë rast është fenomeni.
Ai theksoi se këto sjellje mund të jenë fare miri indiciet e para të një sjellje që mund të degradojë me kalimin e kohës në një tragjedi brenda familjes.
“Personi që vijon me këto lloj sjelljesh duhet të ndalojë…Unë i frekuentoj shpesh këto ambiente, aty kam marrë vesh, që ka pasur një personazh shumë të njohur të showbizz-it. E kam marrë si shkaka, por më pas ma ka konfirmuar një gazetare e kronikës. Unë jam shqetësuar shumë.”, tha Karamuco.
Ndërsa kujton atë që ndodhi në Roskovec, Karamuço thotë se problemet në familje nuk duhet t’i marrim si fenomene që shqetësojnë vetëm rrethet tranzitore rurale, por ato fare mirë mund të gjenden mes nesh.
“Merr vesh që në ekranet e Tiranës dalin njerëz që mund të degradojnë në problematika të rënda….Doja të dërgoja një sinjal publik që sytë duhet të kthehen edhe te njëri-tjetri. Të ruajmë njëri-tjetrin që të mos kemi kështu çrregullimesh.”
Sipas tij, rasti në fjalë mund të jetë një formë zbavitjeje, por mund të jetë edhe pasojë e një frustrimi të shtresëzuar nga marrëdhëniet e brendshme që mund të jetë krijuar me bashkëshortin apo familjarët e tij.
“…Kjo kthehet në opsesion… ta shprehësh me armë zjarri është një fazë disi alarmante. Nuk e dallojmë dot më pas nëse kjo qëllon për t’u qetësuar emocionalisht apo qëllon në formë testi që ta provojë në një ambient tjetër.”
Ervin Karamuço shpreson që statusi i tij të ketë pasur ndikim terapeutik për ata persona që ndjejnë edhe vetë që mund të kenë probleme ndërsa shton se të gjithë duhet të ndihmojmë njëri-tjetrin
