Brenda dy javësh kanë ndodhur dy grabitje të dhunshme në qarkun Gjirokastër. Duke u gdhirë 21 dhjetori, në fshatin Terihat të Dropullit, dy persona të maskuar hynë në shtëpinë e shtetasit Vasil Basho. Terrorizuan nënën e tij dhe një grua tjetër që jetonte me të, Jorgjia Ruçi. Grabitësit morën rreth 1500 euro dhe diku tek 800 mijë lekë të vjetra. Sot ka ndodhur një tjetër grabitje e dhunshme në fshat Memaliaj.
Dy persona të maskuar dhunuan dhe grabitën shtetasin Hiqmet Ramadani, 87 vjeç. Ata e lidhën të moshuarin bashkë me gruan e tij dhe morën rreth 12 milion lekë të vjetra nga një valixhe. Për fat të keq deri më tani nuk është zbuluar asnjë prej këtyre ngjarjeve të rënda. Ndonëse policia ka shoqëruar dhe ka marrë në pyetje disa persona, grabitjet janë pa autorë.
Dyshimet janë që grabitësit të jenë të njëjtët në të dy rastet ose kemi të bëjmë me një grup që gjurmon banesat ku jetojnë vetëm të moshuar dhe i terrorizon nën kërcënimin e armës. Moszbardhja e këtyre ngjarjeve dhe mosarrestimi i autorëve cënon sigurinë publike sidomos në zonat rurale ku banojnë kryesisht të moshuar, që fëmijët i kanë në emigracion ose në qendrat e mëdha urbane. Policia e Gjirokastrës duhet të rrisë forcën goditëse ndaj krimit.
©argjiroja.net
