Në merkaton dimërore u transferua nga Luftëtari te Kukësi, duke hedhur hapin e madh në karrierë. Vasil Shkurtaj, megjithatë, mund të kishte dhënë më shumë nga sa pritej. Vetëm 4 gola në 11 ndeshje kampionati. Në Gjirokastër, Shkurtaj e mbylli me 7 gola aventurën, në gjysmën e kampionatit.
Sigurisht, në pesë ndeshjet e mbetura, i duhen edhe 3 gola që të arrijë atë shifër, por fakti është se duke kaluar te një skuadër me më shumë cilësi, do ta kishte më të lehtë, sidomos duke mos pasur nevojë për ambjentim, në një kampionat që njeh.
I ftuar te “Rubrika Sportive” në RTSH, 27-vjeçari ka folur edhe për garën titull, me Partizanin e shkëputur 10 pikë në krye të renditjes. Shkurtaj përpiqet që të mos mendojë për garën për titull, duke parë hendekun, por matematika ende i jep shpresë.
“Në fillim shihnim Partizanin, tani jo. Në fillim flisnim për titullin, lamë pikë duke folur. Tani përpiqemi të shikojmë ndeshje pas ndeshje. Sa na lejon matematika, kemi edhe ne shanset tona. Normal që besojmë deri në fund. Do të luftojmë”.
Më pas, ai ka përdorur një shprehje të ish-sulmuesit të Holandës, Van Nistelrooy.
“Siç ka thënë Van Nistelrooy, goli është si ‘ketchup’-i. Në fillim del pak, pastaj del i gjithi. Duhet të mos mërzitesh. Po je i qetë vijnë edhe golat”. Në fund, Shkurtaj foli edhe për faktin se nuk është penduar që u kthye në Shqipëri, por sepse erdhi kaq vonë… “Duhet të isha kthyer më herët në Shqipëri, sepse ke më shumë mundësi të luash dhe të tregosh vlerat”.
