Kukësi po tregohet aktiv në merkato dhe po tenton lojtarë të afirmuar. Problemi kryesor për t’u zgjidhur është ai i sulmit. Objektivat e verilindorëve janë bërë të ditura në media prej ditësh, ndërkohë që në njëfarë mënyrë konfirmohen edhe nga ana e drejtorit sportit të Kukësit, Nderim Nexhipit. Ky i fundit ka folu gjerë e gjatë për merkaton, ndërkohë që kur është pyetur për Reginaldon dhe Sebino Plakun, në “RTSH Sport” ka deklaruar:
“Reginaldo ka treguar cilësinë e tij me golat që ka shënuar, por me sa di unë është nën kontratë me Laçin dhe për Kupat e Evropës. Plakun e njoh mirë dhe them se do ishte luks për çdo ekip ta kishte në skuadër. E respektoj shumë. Do të mësohet ditën e ardhshme se çdo të ndodhë, pasi di që ka dhe interes nga jashtë vendit”. Për Plakun interesim ka shprehur klubi norvegjez i Ham Kam dhe me shumë mundësi 33-vjeçari do të rikthehet në vendin skandinav.
Emri tjetër më i lakuar është ai i Idriz Bathës. Mesfushori nga Gjirokastra ende nuk ka rinovuar me Partizanin, ndërkohë që Nexhipi e thotë hapur që ata duan lojtarë me kualitet dhe batha është një i tiillë. Gjithashtu ai përjashton një shkëmbim me Musollin. “Për një rokadë mes Bathës dhe Musollit nuk ekziston mundësia, pasi Musolli është pjesë e padiskutueshme e Kukësit. Bathës i skadon kontrata, por në këtë moment nuk kemi asgjë konkrete. Unë tentoj të marr çdo lojtar që kërkon trajnerit dhe ka kualitet. Unë do mundohem të plotësoj kërkesat e trajnerit. Batha ka shumë kualitet”.
