Edhe Libohova i është përgjigjur thirrjes për ndihmë për familjet e prekura nga tërmeti i fuqishëm që goditi Durrësin. Kryebashkiakja Luiza Mandi, iu bën thirrje banorëve të sjellin ndihma të ndryshme, si dhe vë në dispozicion numrin e llogarisë bankare ku secili mund të depozitojë shuma sipas mundësive. Ndërkohë më herët gjatë ditës nxënës të gjimnazit “11 Shkurti” mblodhën në hollin e shkollës ndihma të ndryshme.
Mesazhi i kryebashkiakes Luiza Mandi
Ky moment dramatik na kërkon të jemi të gjithë bashkë. Kjo situatë emergjente na thërret të bashkojmë mendjet, zemrat dhe forcat për të lehtësuar dhimbjen dhe vështirësitë e familjeve të prekura nga tërmeti. Bashkia Libohovë ju fton të tregojmë solidaritet me të prekurit nga fatkeqësia. Të ndihmojmë me cfarë të mundemi. Në sallën e mbledhjeve të Këshillit Bashkiak ju mirëpresim të sillni kontributet tuaja në ushqime, veshje apo edhe vlera monetare. Bashkia Libohovë është e gatshme të sigurojë edhe akomodimin për rreth 40-50 shtretër në rast se është e nevojshme. Po kështu në dispozicion është edhe numri i llogarisë bankare tek #BankaCredins, ku secili mund të depozitojë para sipas dëshirës.
IBAN ne ALL (Lek): AL29 2121 1016 0000 0000 0030 0001
IBAN ne EUR : AL72 2121 1016 0000 0000 0030 0003
IBAN ne USD: AL02 2121 1016 0000 0000 0030 0002
