Mbrëmjen e kaluar Panajot Barka, me detyrë shef i Departamentit të Gjuhës, Letërsisë dhe Qytetërimit Grek në Universitetin e Gjirokastrës, u ndalua nga policia në Kakavijë pasi me vete kishte rreth 20 libra me përmbajtje për të ashtuquajturin ‘Vorio Epiri’, libra që do t’i conte në universitetin ‘Eqrem Cabej’. Por kjo nuk është hera e parë që Barka tenton të përdorë Universitetin e Gjirokastrës për qëllimet e tij politike mbi të ashtuquajturin ‘Vorio Epir’. Tre vjet më parë, fiks në dhjetor 2015, u zbulua një tjetër skandal që mbante firmën e Panajot Barkës.
Kujtoni dokumentarin e realizuar prej departamentit që drejton Barka në Universitetin ‘Eqrem Cabej’, dokumentar i cili i bën jehonë miteve dhe ushtarëve grekë të rënë në vendin tonë. Bëhet fjalë për një dokumentarin me titull: “Heronjtë luftojnë… si grekë”. I gjithë materiali është në gjuhën greke dhe “hedh dritë” mbi mitologjinë, vendet antike në Shqipëri që kanë përcaktime sipas tij, me burim gjuhën helene e deri te marrëveshjet mes dy qeverive, shqiptare dhe asaj greke, për varrezat e ushtarëve grekë. Përderisa materiali është punuar në gjuhën greke dhe është hedhur për t’u ndjekur nga kanale të shtetit fqinj në youtube, nuk do të kishte ndonjë habi të madhe nëse për autor do të ishte ndonjë individ apo grup ekstremist.
Por në këtë mes mund të bëhet fjalë për një skandal, për shkak se i gjithë dokumentari, ashtu siç përmendet edhe në pjesën përshkruese të videos, është i përgatitur nga një prej departamenteve të Universitetit Shtetëror të Gjirokastrës. Ndërsa për xhirimin e tij janë shfrytëzuar mjetet e TVSH-së, dega Gjirokastër. Teksti dhe skenari është nga Panajot Barka, shefi i departamentit, personi i cili lexon në greqisht të gjithë dokumentarin. Në gjatësinë kohore të tij prej 33 minutash e 22 sekondash, i bëhet jehonë e madhe luftës italo-greke, duke ngritur gati në piedestal Greqinë me rastin e 75-vjetorit të JO-së greke ndaj Italisë.
Dokumentari ishte publikuar në faqen zyrtare të Universitetit të Gjirokastrës, edhe pse kishte një përmbajtje skandaloze. Fjala vjen, sipas dokumentarit, kalaja e Gjirokastrës mori emrin e Argjirosë, e cila ishte me orgjinë greke, e po kështu edhe vet qyteti i Gjirokastrës. E jo vetëm kaq, sepse më tej dokumentari thekson se, edhe mënyra e ndërtimit të kalasë, ikonat e pikturat tregojnë se këtu mori një hov edhe më të madh qytetërimi grek. Rst tjeter eshte Antigonea, që ngrihet jo larg qytetit të Gjirokastrës, në histori njihet si një qendër e themeluar nga Pirro i Epirit në respekt të gruas së tij të parë, Antigonesë. Ndërkohë në dokumentarin, për të cilin ne po flasim, ky qytet antik konsiderohet si një qendër e qytetërimit dhe zhvillimit grek. Në vitin 167 para Krishtit – sipas dokumentarit, – Antigonea do të shkatërrohej së bashku me 70 qytete të tjera të Vorio Epirit.
Ky ishte një dokumentar i rëndë, aq më tepër kur dihet se vjen nga sallat e një institucioni arsimor, që mban emrin e një prej figurave më të mëdha të shkencës, arsimit e kulturës shqiptare, Eqerem Çabejt. Një universiteti, që nuk ka rreshtur së nxjerri figura të njohura, duke përfaqësuar një nga qytetet me traditën më të spikatur kulturore, historike e patriotike. Komentet janë të tepërta. Organet përkatëse duhet të kishin vënë përpara përgjegjësisë arkitektët e këtyre rrymave ekstremiste, që nuk i shërbejnë kurrsesi bashkëjetesës, bashkëpunimit, apo ngritjes së urave të komunikimit e tolerancës. Përkundrazi, materiale të tilla shërbejnë veç për të nxitur ndasi e për të krijuar probleme. Ligjet janë të qarta, tashmë thjesht duhen zbatuar.
©argjiroja.net
