Ndërtesat me një vjetërsi që i kalojnë të 50 vjetët, do t’i nënshtrohen auditimit të detyrueshëm teknik. Kështu parashikohet nga një projektligj i qeverisë që është dërguar në Parlament, që konsiston në kryerjen e auditimit teknik të punimeve, në të gjitha objektet që janë ndërtuar në gjysmën e parë të shekullit të kaluar.
Sipas draftit, auditimi i këtyre objekteve do të kryhet nga Instituti Shtetëror i Ndërtimit. Pas këtij auditimi, për ndërtimet tek të cilat do të konstatohet mosplotësimi i kërkesave minimale të sigurisë, Instituti do të propozojë marrjen e masave përkatëse.
Vlen për t’u vënë theksi tek konteksti i përpilimit të këtij drafti: periudha që pasoi tërmetet e fuqishëm që goditën vendin në datën 21 shtator të këtij viti. Në mënyrë paralele, projektligji parashikon se edhe se për të gjitha ndërtimet e reja, me vlerë preventivi mbi 1 milionë dollarë, oponenca teknike do të bëhet me detyrim nga institutet shtetërore ose entet e tjera të ngarkuara nga ministria e infrastrukturës.
Pas tërmeteve të 21 shtatorit, kjo është masa e dytë ligjore që ndërmerret mbi objektet e reja. Ky draft paraprihet nga vendimi i Këshillit të Ministrave që e bën të detyrueshëm sigurimin e të gjitha apartamenteve në pallatet që ndërtohen nga këtej e tutje.
