Kryebashkiaku i Gjirokastrës, Flamur Golemi, ai i Tepelenës, Tërmet Peçi, si dhe kryetarja e Këshillit të Qarkut, Lindita Rova, kanë qenë së bashku këtë fundjavë për shëtitje me kuaj në një prej fermave të zonës. Fotot i ka publikuar në Facebook kryebashkiaku i Gjirokastrës, i cili e promovon këtë fermë si një alternativë për vizitorët që duan të shijojnë shtigjet malore përmes guidave me kuaj.
Postimi i Golemit.
“Caravan Horse Riding Albania është ndër të tjera edhe një arsye më tepër përse të huajt vijnë në Gjirokastër. Për rreth 9 vite kjo fermë me kuaj e vendosur pak kilometra larg Gjirokastrës mes kodrave piktoreske, tërheq mijëra turistë të cilët ndjekin guidat në zonat malore. Bashkë me Linditën dhe Tërmetin ishim mes mysafirëve të kësaj fundjave në Caravan Horse Riding Albania. Një eksperiencë fantastike që duhet ta provoni dhe sugjeroni tek miqtë tuaj. Për të zgjatur kohën e qëndrimit të turistëve në Gjirokastër, sigurisht që duhen ofruar edhe alternativa të tjera përtej asaj që ka qyteti nga ana historike e kulturore. Diversifikimi i paketës turistike na ndihmon për të patur një zhvillim të qëndrueshëm të këtij sektori jetik për ekonominë tonë. Caravan Horse Riding Albania është një vlerë e shtuar në atë çfarë ofron Gjirokastra për vizitorët vendas e të huaj. Bravo Kristina!
