Shtëpia e “Big Brother VIP Kosova” po dëshmon se ndikimi i saj shkon përtej kufijve, duke arritur deri te yjet e njohur të kinematografisë turke.
Në qendër të këtij momenti viral është Londrim Mekaj, i cili gjatë qëndrimit në shtëpi nuk e ka fshehur aspak admirimin për aktoren e famshme Demet Özdemir. Në një skenë spontane dhe plot humor, të kapur nga kamerat e shtëpisë, Londrimi i drejtohet asaj në turqisht duke thënë: “Demet Özdemir, seni seviyorum canım. Ne yapıyorsun sen?” – një deklaratë që shkaktoi të qeshura dhe simpati te publiku.
Ky moment i veçantë u shkëput shpejt nga fansat dhe nisi të qarkullojë me ritme të shpejta në platformën X (ish-Twitter). Videoja u shoqërua me komente të shumta, ku ndjekësit bënin shaka se dashuria e Londrimit për aktoren turke është po aq e madhe sa ajo e fansave të saj.
Ajo që askush nuk e priste ishte reagimi i vetë yllit të serialeve turke. Nga llogaria e saj zyrtare dhe e verifikuar në X, Demet Özdemir i bëri “like” njërit prej postimeve ku shpërndahej videoja e Londrimit, duke treguar se e kishte parë dhe e kishte vlerësuar këtë dedikim.
Ky veprim nuk kaloi pa u vënë re nga ndjekësit e “Big Brother VIP Kosova”, të cilët nisën menjëherë të ndajnë “screenshot-e” të pëlqimit të aktores, duke e kthyer momentin në një tjetër episod viral.
