Gjirokastritët bëjnë të njëjtat gabime në çdo ndeshje dhe nuk arrijnë të marrin pikë, ndërkohë që kalendari në vazhdim është më i vështirë
Gëzim Beqiri
Pas një dite pushimi, Luftëtari rifillon sot stërvitjen për ndeshjen e ardhshme, që është shumë e vështirë, pasi do të presë në Gjirokastër Flamurtarin. Pritet një analizë e hollësishme për humbjen në Shkodër, por duket se deri në përfundim të fazës së dytë ekipi do të shoqërohet nga problemet në lojën e vet.
GABIMET – Është po ajo mënyrë loje, janë po ato gabime dhe jo vetëm nga një apo dy lojtarë. Gjithçka nis që nga portieri e deri te lojtarët e stolit. Trajneri Hasan Lika nuk ka çfarë të bëjë tjetër, sepse në të gjitha ndeshjet e zhvilluara nga Luftëtari nën drejtimin e tij, janë identike me njëra-tjetrën. Pësohet gol në momentin kur skuadra është tejet e papërqendruar, me pasime të gabuara, sidomos pasimi i fundit. Edhe kur futbollistët nuk janë nën presion, vazhdojnë të gabojnë. Luftëtari është skuadra që jo vetëm ka pësuar më shumë gola, por edhe që ka shënuar më pak në Superiore. Trajneri Lika dhe stafi i tij vazhdojnë të besojnë se ekipi do të ndryshojë, por ndoshta kërkohen korrigjime për fazën e tretë. Në vazhdim Luftëtari ka një kalendar të vështirë, pasi pret javën e ardhshme Flamurtarin, shkon në fushën e Kamzës dhe pas takimeve ndaj Partizanit, Kukësit dhe Skënderbeut, e mbyll pjesën e parë të sezonit në Lushnjë. Ka kaluar një e treta e kampionatit dhe Luftëtari i është bashkuar Lushnjës në dyshen e fundit, që do të thotë rënie nga kategoria. Qoftë edhe një barazim në Shkodër ndaj Vllaznisë do të ishte me shumë vlera, por ekipi bëri po ato gabime si në ndeshjet e tjera.
MERKATO – Shpresa për të ndryshuar gjendjen e skuadrës mbetet vetëm te merkatoja e janarit. Tashti pranohet se merkatoja e verës është plotësisht e dështuar. Të gjithë të ardhurit, bashkë me trajnerët nga Uruguai, me përjashtim të Toledos që qëndron në stol, janë larguar. Luftëtari është e vetmja skuadër që luan vetëm me futbollistë vendas, por nuk është këtu e meta. Trajneri Lika nuk e shpreh, por fakti që bën pak zëvendësime dhe u jep shumë pak kohë lojtarëve të stolit, tregon se Luftëtari ka mungesë futbollistësh. Nuk duhet mjaftuar me shpresën e tanishme, sulmuesin Vasil Shkurtaj, i cili pritet të aktivizohet në fazën e tretë. Sidomos në ndeshjet e fundit del si kërkesë ndërhyrja në merkato për të plotësuar jo vetëm numrin e futbollistëve për të përballuar kampionatin, por edhe lojtarë cilësorë për të bërë ndryshimin e madh te Luftëtari. Dhe nuk është vetëm mungesa e portierit. Shumë të interesuar për të parë ndryshimin në ekip janë edhe tifozat gjirokastrite, të cilët nëpërmjet rrjeteve sociale kërkojnë që të ketë përgjegjësi nga stafi teknik në përzgjedhjen e lojtarëve, sepse të ardhurit e fundit nuk e kanë justifikuar aktivizimin./sportekspres
