Vllaznia ia del të fitojë në transfertë ndaj Luftëtarit me rezultatin 0-2. Shkodranët u treguan më të saktë në minutat e fundit të ndeshjes, aty ku arritën edhe të shënon golat e fitores. Në këtë formë, shkodranët përkeqësojnë edhe më shumë situatën te gjirokastritët. Këta të fundit ishin më kërkues gjatë takimit, teksa patën shanset për të shënuar.
Megjithatë, përballë portierit Sherri u treguan të pasaktë. Ndërkohë, në fraksionin e dytë, Luftëtari ishte sërish më i orientuar drejt sulmit. Por, nuk u treguan të zotët për të finalizuar aksionet. Teksa edhe në një rast, Fili gaboi përballë Sherrit duke mos gjetur kuadratin. E kundërta nga ana tjetër, Vllaznia shfrytëzoi në maksimum rastet e saj.
Goli erdhi në minutën e 84 falë një goditje të saktë me Malotën. Ndërsa, në fund goditjen finale e dha Lika. Sulmuesi shfrytëzoi një pasim nga Shtubina, dhe nuk gaboi në qendër të zonës. Pas kësaj ndeshje, Vllaznia ngjitet në vendin e katërt, ndërsa Luftëtari mbetet në vendin e parafundit.
