Ekipi gjirokastrit është zhvendosur nga dje në Slloveni, ku do të zhvillojë përgatitjet për ndeshjet me letonezët e Ventspils në Europa League. Luftëtari ka ndryshuar, pasi tashmë në krye të tij është trajneri slloven Kostiç, por edhe grupi i lojtarëve nuk është ai që mbylli sezonin.
Ka pasur largime, detyrimisht edhe afrime. Kanë ardhur në ekip një portier, një mbrojtës qendre dhe një sulmues anësor, të tre të huaj, si dhe disa të rinj. Bukovski, Janiçiç dhe Milosavljev janë përforcimet e deritanishme, por afrimi më i rëndësishëm është rikthimi Bregut, i cili do të luajë me Luftëtarin në ndeshjet e europiane.
Megjithatë, gjirokastritët nuk janë ende të kompletuar dhe në Slloveni pritet që me ekipin të bashkohen edhe një ose dy sulmues. Në listën e gjirokastritëve ka qenë edhe emri i mesfushorit shkodran Vucaj, pavarësisht se ai nuk e ka zgjidhur ende çështjen e kontratës me Vllazninë.
