Ashtu siç kishte paralajmëruar ”Panorama Sport” në numrin e sotëm, Luftëtarit i ka mbërritur afrimi i merkatos së janarit, Usama Mutumane. Mesfushori i Kombëtares së Mozambikut vlerësohet si një goditje e madhe, teksa bëhet fjalë për një lojtar me tipare difensive, që luan në rolin e një shkatërruesi.
Ardhja e Usamës shton konkurrencën në mesfushën e gjirokastritëve, teksa në rolin e tij luajnë emra si Ramadani, Rrapo, Rrapa dhe Aleksi. Ndërkohë, të hënën do të mbërrij në Gjirokastër edhe sulmuesi nga Angola, Pedro Bengui, i afruar në merkaton e janarit. Si Usama, ashtu edhe Bengui, po i bashkohen me kaq vonesë skuadrës për shkak të problemeve që kanë patur me vizat.
Fillimisht ata janë detyruar të udhëtojnë drejt Egjiptit, e më pas të kenë destinacion Shqipërinë. Gjasat janë që të dy të huajt të jenë gati për Luftëtarin në javën e ardhshme, pasi burime në klub tregojnë se të dy vijnë të stërvitur dhe me faza përgatitore të zhvilluara me ekipet e fundit. Bengui vjen pas eksperiencës së shkurtër tek AEL Limasol.
