Vetëm një vit pasi u zhvendosën në Cotswolds për të nisur një kapitull të ri larg “rreziqeve” të Amerikës së Donald Trump, Ellen DeGeneres dhe bashkëshortja e saj Portia de Rossi kanë lënë pas ëndrrën britanike. Çifti, që synonte një jetë të qetë rurale në fshatin anglez, u përball me një sërë fatkeqësish që nisën brenda pak ditësh nga vendosja në pronën e tyre prej 15 milionë paundësh.
Moderatorja 67-vjeçare dhe aktorja 52-vjeçare investuan miliona paund për të transformuar fermën 43-akrëshe në një rezidencë të standardeve hollywoodiane. Edhe pse arkitektët parashikonin 18 muaj restaurim, Ellen nguli këmbë për ta përfunduar dyfish më shpejt dhe punësoi rreth 70 ndërtues për ta realizuar.
Rezultati ishte një pronë me shtatë dhoma gjumi, një pishinë të brendshme, palestër, sauna, pistë uljeje për helikopterin, një “hangar festash”, dhe një vilë të veçantë për miq ose staf duke e kthyer fermën në një strehë luksoze, të projektuar si për relaks, ashtu edhe për evente.
Megjithatë, vetëm disa ditë pas zhvendosjes, lumi Windrush doli nga shtrati për shkak të stuhisë Bert, duke rrethuar të gjithë pronën me ujëra përmbytjeje dhe ujëra të ndotura. Çifti u detyrua të largohej me urgjencë dhe u zhvendos në një shtëpi tjetër – këtë herë një rezidencë ultramoderne prej 25 milionë paundësh në majë të një kodre, më e ngjashme me vilat e Montecitos dhe Malibus ku kishin jetuar më parë.
Daily Mail raporton se jeta e tyre në Mbretërinë e Bashkuar u shoqërua me tensione me fqinjë aristokratë dhe figura të njohura të zonës. Thuhet gjithashtu se Princi Harry dhe Meghan Markle – ish-fqinjët e çiftit në Montecito mund të kenë pasur një rol të tërthortë në zgjedhjen e pronës.
Përpara blerjes, Ellen dhe Portia kishin “rrëzuar” nga gara një blerës tjetër serioz duke ofruar 2.5 milionë paund më shumë se çmimi i kërkuar për të siguruar pronën e ëndrrave.
Rajoni i Cotswolds është i famshëm për pronat e tij piktoreske dhe ka tërhequr emra të mëdhenj si Beckham, Kate Moss, Simon Cowell dhe anëtarë të Familjes Mbretërore. Por moti i ashpër britanik, i paparashikueshëm dhe larg klimës së ngrohtë të Kalifornisë, duket se ka qenë një arsye e fortë që çifti nuk e pa veten duke qëndruar gjatë.
Burime të brendshme thonë se Ellen dhe Portia janë rikthyer tashmë në SHBA për të kaluar sezonin festiv, dhe nuk ka shenja se do të nxitohen të kthehen në Cotswolds. Shtëpia, e rikthyer në treg nga Sotheby’s International në korrik, mbetet e disponueshme për blerësit e interesuar.
