Ishte malli për gjyshërit që jetonin në Berat, që e ktheu 18-vjeçaren Vikena Greku në atdhe, por e reja humbi jetën në aksidentin tragjik të Ura e Dajlanit. Familja Greku do ta përcjellë të renë sot për në banesën e fundit dhe do të prehet në atdhe, ndonëse prej vitesh kishin emigruar. 18-vjeçarja jetonte me dy prindërit dhe vëllanë e vogël në Gjermani dhe ishte kthyer për të takuar dy gjyshërit.
Pas ikjes së prindërve në Gjermani vite më parë, Vikena dhe vëllai i saj i vogël kishin ndenjur me gjyqshërit në fshatin Dyshnik në Berat, ku edhe kishin vazhduar shkollën 9-vjeçare, derisa prindërit kishin mundur të bëjnë letrat e fëmijëve, për t’i marrë me vete në Gjermani.
Ndërkohë, Gjykata e Durrësit ka caktuar masën e sigurisë “arrest në burg” për Arbër Xhaxhajn, i cili shkaktoi aksidentin tragjik e ura e Dajlanit. Ndaj të riut rëndojnë veprat penale Drejtimi i mjetit në mënyrë të parregullt” të parashikuar nga neni 291 K.Penal dhe “Shkelja e rregullave të qarkullimit rrugor”, parashikuar nga neni 290/3 K.Penal”.
Aksidenti tragjik u shënua mbrëmjen e 15 janarit rreth orës 23:15, te Ura e Dajlanit, në hyrje të Durrësit. 26-vjeçari nga Fieri, i cili drejtonte mjetin me shpejtësi deri në 130/km në orë dhe në gjendje të dehur, raportohet se ngatërroi korsinë e lëvizjes. Shoferi i dehur mori rrugën e portit në vend të asaj të plazhit. Nga shpejtësia e lartë automjeti tip ‘BMW’ u përplas me trafik ndarësen, duke e çarë atë dhe me tej.
BMW-ja ra nga mbikalimi dhe më pas mjeti përfundoi brenda një dyqani që tregtonte lule. Kështu 18-vjeçarja Vikena Greku, pasagjere në sediljen e parë ndërroi jetë në vendin e ngjarjes, ndërsa 26-vjeçari dhe 2 këmbësorë që ndodheshin në zonë gjatë kohës që u bë aksidenti mbetën të plagosur.
