Një detaj prekës dhe i dhimbshëm është zbuluar së fundmi për jetën e futbollistit të ndjerë Diogo Jota, përmes biografisë së tij zyrtare që pritet të publikohet në Portugali. Në qendër të këtij rrëfimi është bashkëshortja e tij, Rute Cardoso, dhe mesazhi i fundit që ajo i kishte dërguar pak para aksidentit fatal.
Sipas librit, Rute kishte dashur t’i ndante me të një moment të veçantë nga jeta e tyre videon e dasmës. Pa e ditur se Jota kishte pësuar një aksident tragjik me një Lamborghini Huracan të marrë me qira në një autostradë në Spanjë, ajo i shkruan:
“Dashuria ime, kur të ndalesh, më telefono, sepse kam diçka për të të treguar.”
Ky mesazh nuk u lexua kurrë.
Futbollisti 28-vjeçar, i cili ishte pjesë e klubit të njohur Liverpool, humbi jetën në korrik të vitit të kaluar. Sipas autoriteteve spanjolle, aksidenti ndodhi kryesisht si pasojë e shpejtësisë së lartë. Në momentin e tragjedisë, Jota po udhëtonte së bashku me vëllain e tij, Andre Silva, drejt Santander, për të kapur një traget për në Mbretërinë e Bashkuar, pasi i ishte këshilluar të mos fluturonte për shkak të një operacioni në mushkëri.
Biografia, e shkruar nga ish-futbollisti Jose Manuel Delgado dhe e titulluar “Nunca Mais é Muito Tempo” (“Kurrë më nuk është një kohë e gjatë”), pritet të publikohet më 9 prill. Botuesit e përshkruajnë librin si një vepër thellësisht emocionale, që i bën homazh jetës dhe trashëgimisë së Jotës – jo vetëm si një futbollist elitar, por edhe si njeri.
Në një intervistë për televizionin portugez, prezantuesja Isabel Figueira u ndal te ky moment i dhimbshëm, duke e cilësuar si një nga pjesët më tronditëse të librit, ku rrëfehen mesazhet e fundit që nuk arritën kurrë tek destinacioni i tyre.
