Deri në prezantimin e trajnerit të ri të Luftëtarit, në klubin gjirokastrit ekziston një kaos, që ka përfshirë edhe akademinë. Klubi i besoi trajnerit Petraq Meçi stërvitjen e ekipit të parë, derisa të gjendej tekniku i ri i Luftëtarit. Mirëpo, dje Meçi nuk ka drejtuar skuadrën, ashtu siç ka ndodhur në 10 ditët e fundit. Në stërvitjen e radhës, bluzinjtë janë drejtuar nga ish-kapiteni i Luftëtarit, Neritan Novi, si dhe trajneri i ekipit U-17, Arbër Bistri.
Mungesa e Meçit krijoji habi, por gazeta zbulon se trajneri që shpalli kampion skuadrën U-19 të Luftëtarit, ka mbetur i indinjuar nga lëvizjet e fundit që janë bërë te akademia. Në vend të tij është emëruar si trajner Gazmend Bimi, në një kohë që Meçit nuk i është sqaruar pozicioni që do të ketë në klub. Në këto kushte, pa u sqaruar situata, trajneri ka vendosur të mos pranojë drejtimin provizor të Luftëtarit.
