Luftëtari ka bërë deri tani tre afrime zyrtare, duke mbushur organikën pas largimeve në përfundim të sezonit që shkoi. Janë afruar portieri Bukovski, mbrojtësi Janiçiç dhe sulmuesi Milosavljev, ndërkohë që Vucaj po stërvitet me ekipin dhe pritet të huazohet për ndeshjet europiane.
Por nuk mbyllet me kaq. Trajneri Millosh Kostiç mësohet se pret edhe një sulmues, për ta konsideruar ekipin të kompletuar. Nuk jepen detaje, por me shumë mundësi është një sulmues qendre, i cili pritet të vijë edhe nga ekipet greke. Gjirokastritët presin të mësojnë emrin e kundërshtarit në turin e parë të Europa League dhe po përgatiten intensivisht. Jakovljeviç dhe Rroca nuk do të jenë të gatshëm për ekipin në ndeshjet e para.
