Nën efektin e festës së 14 korrikut, që përkon me “Besëlidhjen” e Poçemit (dekada më parë edhe Bylisi ka mbajtur emrin “14 Korriku”), mallakastriotët nuk i kanë ndërprerë stërvitjet as në fundjavë, madje janë përgatitur me 2 seanca në ditë. I njëjti program do të ndiqet edhe këtë javë, duke shtuar “dozat” e ngarkesës sepse grupi qshtë i plotë.
Por tashmë në Ballsh kanë menduar diçka më ndryshe sepse duan që në fundjavë, të kenë mundësi që të luajnë edhe një ndeshje miqësore për të parë se ku janë lojtarët me formën e tyre. Ndaj edhe me shumë gjasa, mallakastriotët do të zgjedhin një nga ekipet e së Parës ose dhe nga Superiorja.
Te Bylisi, duket se nuk kanë në plan që të nxitohen në merkaton në hyrje, ku siç dijet pak ditë më parë afruan një emër që ka spikatur me Flamurtari dhe Besën, siç është braziliani Oliveira, me eksperiencë. Por jo vetëm kaq, pasi synohet edhe një portier, mbrojtës qendre dhe sulmues goli. Në të tria pikat, nëse drejtuesit gjejnë të duhur dhe për këtë po përpiqen, atëherë skuadra me kontingjentin që ka do të synojë një nga vendet e sipërme në tabelën e renditjes.
Natyrisht, që duke parë formën e kapur sezonin e shkuar por edhe ambiciet e tyre dhe kulmin e karrierës, një vend do e kërkojnë edhe Sulovari, Kane apo Ibrahim. Megjithatë, në një kampionat të gjatë dhe garë mjaft të fortë, në Ballsh do të kërkojnë më shumë se kaq, pasi presidenca kur bëhet fjalë për elementë cilësorë, Besnik Kapllanaj ka ditur që të zgjedhë më të mirët.
Mjafton që të shohësh merkaton dhe afrimet e janarit të shkuar, ku Bylisi sfidoi edhe më të mirët të elitës. Por ky sezon do të jetë shumë më i fortë ndaj edhe duke parë disa lëvizje sidomos në dalje, ballshiotët duke mos u nxituar synojnë që së paku të bëjnë edhe 4-5 afrime duke forcuar dukshëm formacionin e stolin.
Ndërsa pritet që së shpejti të mbërrijnë edhe disa talentë afrikanë më Ballsh, që do të shërbejnë për moshat dhe skuadrën B. Kjo javë pritet që të sjellë zhvillime në Ballsh, ndaj edhe tifozët jo më kot kanë filluar që të bëhen kureshtarë duke qenë edhe në seancat stërvitore për të mësuar lëvizjet e fundit në skuadrën e tyre të zemrës.
