Pamja qe shihni në fotot më poshtë është e zakonshme në Gjirokastër. Cdo ditë prej orës 6:30 të mëngjesit deri rreth orës 11:00 në qendër të lagjes “18 Shtatori” shitësit ambulantë tregtojnë qumësht jashtë çdo kriteri higjeno-sanitar. Ky problem vazhdon prej vitesh dhe askush nuk merr masa. Përveç rrezikut që mbart tregtimi i qumështit mes pluhurit e vapës, pamja që ofrohet përditë në mes të lagjes më të populluar në qytet, është e pazakontë. Bashkia e Gjirokastrës nuk ka ndërtuar ende një treg për sistemimin e këtyre shitësve.
Nga ana tjetër AKU Gjirokastër bën sikur i gjobit apo sikur i largon nga sheshi tregtarët, por ata vazhdojnë të qëndrojnë aty prej vitesh. Në duam ta thjeshtëzojmë këtë problem, mund të themi;‘Gjynah, janë hallexhinj që nxjerrin bukën me këtë punë…’ Por në fakt problemi është më i gjerë sesa kaq. Tregtimi i qumështit në këtë mënyrë është rrezik për shëndetin dhe nga ana tjetër, pamja që të ofrohet cdo ditë në këtë shesh është aspak e denjë për një zonë urbane, për një qytet të UNESCO-s e që pretendon të zhvillohet përmes turizmit. Pas kaq vitesh u bëtë mukajet që hoqët tregun e shëmtuar me beze e arka në mes të qytetit. Ka ardhur koha të sistemoni edhe këta pak tregtarë që si për inerci vazhdojnë dhe dalin te i njëjti vend prej vitesh.
© ArgjiroLajm.net
