Presidenti Ilir Meta ka vijuar replikat me kryeministrin Edi Rama. Përmes një tjetër statusi, Meta shkruan se Rama nuk ka plan e strategji për të vijuar me trajtimin e Covid-19 në Shqipëri por vetëm propagandë. Sipas Metës, Rama vetë nuk paguan asgjë për medikamentet ndërsa shqiptarëve u kërkon që të mos sëmuren pasi nuk u rimburson dot asnjë qindarkë për ilaçet.
“Nuk ke plan! Nuk ke strategji! Ke vetëm propagandë! Çdo ditë po humbin jetën qytetarë! Çdo ditë numri i të infektuarve po shtohet frikshëm! Ku e ke shëndetësinë falas? Pse nuk ju rimburson çdo qindarkë që paguajnë për ilaçe pacientët që mjekohen në shtëpi, familjet në nevojë dhe pensionistët e infektuar me COVID-19? Pse nuk i shton testimet? Pse nuk e shton buxhetin për sistemin shëndetësor? Ti për vete nuk paguan asnjë kacidhe për ilaçe, ndërsa çdo shqiptari sot me arrogancë i thua: “Mos u sëmur se shteti nuk kujdeset dot për ty! As ilaçet nuk ja u paguaj!” Mos i fshihni të dhënat për COVID-19 për të mbuluar paaftësinë tuaj në menaxhimin e kësaj situate, prag kolapsi! Mjaft me justifikime dhe batuta bajate! Si nuk u lodhe 8 vite duke vjedhur papushim me koncesione dhe PPP? Askush në botë nuk e shfrytezon pandeminë për të vjedhur si ti dhe Parlamenti yt monist që bën ligje për oligarkët në kulmin e kësaj fatkeqësie! Askush nuk mund të prishte Teatrin Kombëtar në gjendje të jashtëzakonshme për të ndërtuar kulla për oligarkët! MOS I FSHIHNI TË DHËNAT PËR COVID-19!”- shkruan Meta.
Shtimi i të infektuarve me Covid-19 ka futur në përplasje Presidencën dhe Kryeministrinë. Ilir Meta kërkon shtimin e mjekëve, spitaleve të Covid, rimbursimin e medikamenteve dhe ndalimin e tenderave korruptivë. Rama shkruan se katastrofa shëndetësore është ëndrra e Metës dhe e Opozitarëve, por në fakt janë ata që do dështojnë dhe jo mjekësia në Shqipëri.
