Komediani Jimmy Kimmel ka nënshkruar një zgjatje kontrate njëvjeçare me ABC, duke siguruar vazhdimësinë e Jimmy Kimmel Live! deri në vitin 2027, pasi shfaqja e tij u pezullua përkohësisht shtatorin e kaluar për shkak të presionit nga Shtëpia e Bardhë, konfirmuan mediat amerikane.
Zgjatja e kontratës së Kimmel, siç citohet nga botimi tregtar Hollywood Reporter, vjen pasi ABC, një degë e Disney, pezulloi papritur ‘Jimmy Kimmel Live!’ më 17 shtator, pasi prezantuesi kritikoi reagimin e administratës së Presidentit Donald Trump ndaj vrasjes së aktivistit ultrakonservator Charlie Kirk. Kryetari i Komisionit Federal të Komunikimeve (FCC), Brendan Carr, një aleat i ngushtë i Trump, kishte kërcënuar të revokonte licencat e bashkëpunëtorëve të ABC nëse rrjeti nuk do ta ndëshkonte Kimmel.
Pezullimi i programit shkaktoi një valë kritikash dhe shqetësimesh për lirinë e shprehjes në vend. ABC e riktheu komedianin në program më 23 shtator, një javë më vonë, dhe rikthimi i tij arriti një audiencë prej 6.3 milionë shikuesish, shifra më e lartë në dhjetë vjet.
Në monologun e tij kontrovers, Kimmel satirizoi lëvizjen politike MAGA të Trump duke deklaruar se ata kishin bërë “të pamundurën për ta treguar personin që vrau Charlie Kirk sikur të mos ishte një prej tyre dhe, rastësisht, kishin shfrytëzuar rastin për të përfituar politikisht”.
Kontradiktat rritën popullaritetin e komedianit , i cili sipas një sondazhi të YouGov dhe The Economist , e vendosi atë 4 pikë përqindje përpara presidentit të SHBA-së tetorin e kaluar.
