Është zbuluar identiteti i autores që tronditi dje kryeqytetin pasi vrau motrën e saj me thikë brenda banesës tek rruga e Kavajës.
Ajo është Marsela Pushani, ndërsa 37-vjeçarja që ndërroi jetë quhet Armanda Pushani.
Sipas dëshmisë së dhënë në polici nga autorja 37-vjeçarja ishte e alkoolizuar dhe se kishte kërcënuar të gjithë familjen se do t`i vriste.
“Veprova në kushtet e vetëmbrojtjes, na kërcënoi se do na vriste. Prej më shumë se 10 vitesh motra Amanda Pushani ishte e alkoolizuar dhe problematike. Debatuam me të që të linte alkoolin, Amanda më kërcënoi mua dhe mamanë,” mësohet të ketë thënë ajo.
Madje ka shtuar se e motra ka kërcënuar edhe shitësit e marketeve të lagjeve të cilëve u kërkonte pije alkoolike pa lekë përndryshe do t’u thyente marketin.
Report Tv ka shkuar pranë marketeve të lagjes por vetëm njëri prej shitësve ka pranuar të japë detaje jashtë kamerave. Shitësi ka pohuar se viktima kërkonte të merrte pije alkoolike pa lekë, por ka shtuar se nuk e ka kërcënuar asnjëherë.
Madje ai është shprehur se edhe babi i viktimës sipas tij ka ndërruar jetë nga konsumimi i tepërt i pijeve alkoolike.
Pas vrasjes, familjarët tentuan të fshehin ngjarjen dhe raportuan atë si vdekje natyrale, por pas ekzaminimeve të kryera në trupin e saj u konstatuan plagë të shkaktuara nga thika.
Policia ka arrestuar motrën e saj, me profesion mësuese, ndërsa kjo e fundit ka deklaruar se vrasjen e bëri në kushtet e vetëmbrojtjes, pasi 37-vjeçarja e kishte kërcënuar se do e vriste atë dhe nënën.
