Pas spektaklit në Kupë, Ernest Muçi vijon me paraqitjet fantastike edhe në kampionat, këtë herë duke realizuar një gol trepikësh, një gol fantastik në minutën e 91-të. Trabzonspor i falet edhe një herë sulmuesit kuqezi, me këtë të fundit që po mban Trabzonspor në garë për titull në një kohë kur ekipi i tij e sheh veten në vendin e tretë në kuotën e 38 pikëve, 5 më pak se Galatasary kryesues.
Në transfertën kundër Kocaelispor, Trabzonspor vuajti jo pak ku u desh një kryevepër e Muçit në minutën e 91-të për t’i dhuruar fitoren pas suksesit 1-2. Ky ishte goli i tij i tetë sezonal në kampionat, i 10-ti këtë sezon në të gjithë turnet.
Pas ndeshjes, Muçi nuk e fshehu gëzimin për këtë gol dhe për këtë fitore: “Kjo ishte një nga ndeshjet më të vështira të sezonit. Skuadra jonë e meritoi fitoren, luftuam për çdo top. Unë jam shumë i lumtur, këto ishin 3 pikë shumë të merituara”, u shpreh Muçi ndër të tjera.
Një paraqitje fantastike dhuroi këtë javë edhe Kristjan Shpendi. Sulmuesi kuqezi realizoi një “dopjetë” golash për Cesena-n në sfidën kundër Reggiana-s. Me këtë dy golësh, Shpendi ngjitet në kuotën e 8 golave në Serie B.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
