Gazetarja e News 24 në Gjirokastër, Brikena Metaj, është vlerësuar sot me çmimin e parë në konkursin mediatik për çmimin kombëtar Fatos Baxhaku, “Media lokale për çështjet vendore”. Në ceremoninë e organizuar me këtë rast ishte i pranishëm edhe kreu i Unionit të Gazetarëve Shqiptarë, Aleksandër Çipa.
“Nuk gjej fjalë ta shpreh emocionin, ashtu siç e pata të vështirë edhe aty, ku u gjenda e papërgatitur dhe emocionet ishin të shumta. Këtë çmim dua ta ndaj me operatorin dhe mikun tim, prej 8 vitesh së bashku, Soni Kuçi, pa të cilin idetë e mia nuk do të merrnin dot jetë ashtu si duhet. Mirënjohje dhe vlerësim për të gjithë kolegët”, shprehet Metaj në një postim në faqen e saj në Facebook.
Gjatë ceremonisë së shpërndarjes së cmimeve, ishte e pranishme edhe kryetarja e Këshillit të Qarkut Gjirokastër, Lindita Rova.
©argjiroja.net
