Historia e 17-vjeçares së përdhënuar në Sarandë, të paktën sipas akuzave të ngritur nga vetë adoleshentja, ka marrë një drejtim krejt të paqartë. 17-vjeçarja tashmë ka një urdhër mbrojtje për prindërit e saj, të cilët nuk lejohen tashmë që t’i afrohen të bijës.
Kjo ka ardhur pas deklaratës së bërë nga vetë adoleshentja, e cila pas Bajram Tushës, ka akuzuar edhe të atin për përdhunim.
Gjatë një interviste për gazetën “Panorama”, prindërit e vajzës i kanë mohuar të gjitha deklaratat e të bijës dhe shprehen se edhe 72-vjeçari Bajram Tusha është i pafajshëm.
“Duam të shpëtojmë vajzën nga kthetrat që i janë hedhur nga një i ri, që hiqet si i dashuri i saj. Vajza është pre e mashtrimit. E kanë droguar dhe kanë qëllim trafikimin…,”- thonë ata.
“Unë tani kam shqetësim për vajzën, se më përpara nuk kam pasur. Ajo thotë që ka ndodhur para tri vitesh… Vajzën time e mori shteti, se ajo më ka denoncuar edhe mua. Më ka përdhunuar babai thotë, më ka përdhunuar edhe Barjam Tusha. E kupton tani se çfarë i ka bërë ai vajzës. Kushedi çfarë i ka hedhur, i ka shpëlarë trurin dhe vajza më tha më çoi babi në një makineri më vuri diçka në kokë, shtypi një buton…,”– thotë i ati.
Djali i të burgosurit, Tusha ka reaguar i shokuar nga ngjarja.
“Kurrën e kurrës nuk e bënte një gjë të tillë babai im. Nuk di se çfarë të them, nuk e besoj. Atë vajzë nuk e kam parë ndonjëherë në shtëpinë time. Habitem nga doli kjo,”– thotë ai.
17-vjeçarja, pas denoncimit të bërë në Polici, është dërguar në një qendër rehabilitimi në Tiranë.
Dy ditë më parë 72- vjeçari, Barjam Tusha, u ndalua nga policia me akuzën për “Marrëdhënie seksuale ose homoseksuale me dhunë me të mitur”. Edhe një ditë më parë, nëna e vajzës kërkoi ndihmë. Ajo u shpreh se është i dashuri i saj, që është i martuar me një grua në Itali, i cili po u mashtron vajzën dhe po e shtyn të gënjejë.
