Shumë mesazhe ngushëlluese kanë vërshuar në rrjet sot për ndarjen nga jeta të Sefedin Brahos. Legjenda e fubtollit, që ka shkruar histori me Luftëtarin, Partizanin dhe Kombëtaren, mbylli sytë ne moshën 71-vjeçare. Përtej këtyre, një mënyrë tjetër për të nderuar Sefedinin, është që stadiumi i Gjirokastrës të marrë emrin e tij. Tani e pa humbur më kohë!
Braho është mes emrave më të spikatur të plejadës së tij në futbollin gjirokastrit. Zor se mund të ketë kundërshti në Këshillin Bashkiak për një propozim të tillë. Duhet thjesht vullnet për ta çuar nismën përpara. Emërtimi “Luftëtari” apo “Gjirokastra” për stadiumin nuk thotë asgjë.
Emërtimi i ri Stadiumi “Sefedin Braho” është më domethënës dhe nderon më tej futbollistin ikonë të klubit gjirokastrit dhe të Partizanit. Mos o Zot të ktheheni mbrapa te emri i ish-prokurorit të diktaturës “Subi Bakiri”. Më shumë se 3 dekada pas rënies së komunizmit, ky do të ishte një gabim i madh.
Kollaj të thurësh zinxhirë lëvdatash në rrjetet sociale për Sefedin Brahon. Nderojeni veprën e tij duke ia vendosur emrin në stadiumin ku Sefja shkroi histori. ©Argjiroja.net
