Bylis nuk njeh fitore për këtë vit teksa edhe në ndeshjen e sotme e cila konsiderohej si e lehtë në letër, ballshiotët nuk shkuan më shumë se barazimi 1-1 ndaj Luftatërit. Gjirokastritët respektojnë deri në fund kampionatin edhe pse ndodhën në një situatë të vështirë në klasifikim, megjithatë sërish gjejnë forcën për të luftuar me djemtë e rinj në skuadër. Sa i përket ndeshjes, Bylis ishte më mirë në pjesën e parë, teksa patën shanse për të shënuar, megjithatë goli duhej të vinte vetëm me 11-metërsh.
Lala shtyn në zonë Guindon dhe arbitri Llapra nuk heziton të akordojë penallti për miqtë. Nga pika e bardhë, Guindo ekzekuton saktësisht dhe iu jep avantazhin të tijve. Por, në minutën e 44, Bylis befasohet teksa në zhvillimet e një goditje dënimi, Lika harkon në zonë. Një harkim që nuk devijohet nga askush dhe befason portierin Miraka i cili me shikim e shoqëron në rrjetë. Kështu, pjesa e parë mbyllet në barazim 1-1.
Fraksioni i dytë i sfidës foli më shumë për vendasit që provuan të merrnin pikët e plota, por në momentet e fundit, gjirokastritët nuk ia dilnin të konkludonin. Ndërkohë, pas minutës së 75, iniciativa kaloi nga ana e Bylisit që kërkonte fitoren por nuk ia dolën me Luftëtarin që rezistoi, ndërsa në fund gjirokastritët kërkuan edhe një penallti por që nuk ishte i këtij mendimi kryesori Llapra. Pas këtij rezultati, Bylis mbetet në vendin e shtatë të klasifikimit dhe rrezikon tashmë pasi ndjen hijen e Vllaznisë. Sakaq, vendasit mbeten të parafundit në klasifikim.
