“Australian Open” ka dhuruar të premten dy gjysmëfinale nga më epiket në historinë e këtij kompeticioni, duke përcaktuar edhe finalen e madhe të së dielës, aty ku Karlos Alkaraz dhe Novak Xhokoviç do të matin forcat për trofeun e parë Grand Slam të sezonit. Rreth dhjetë orë për dy ndeshje të jashtëzakonshme, me Alkarazin që elimonoi Zverevin, ndërsa Xhokoviç bëri për lot italianët, duke shkurorëzuar Janik Sinerin, fitues I dy edicionevce të fundit në Grand Slamin e Melburnit.
Novak Xhokoviç reagon menjëherë sa herë që i përmendet se është pas Karlos Alkarazit dhe Janik Sinerit. “Rivalët e mi të mëdhenj kanë qenë Roxher Federer dhe Rafael Nadal. Unë nuk kam qenë gjithmonë ndjekësi”, përgjigjet ai, duke iu referuar epërsisë së tij në shifra ndaj dy tenistëve të tjerë të “Big Three”. Xhokoviç ka rikonfirmuar dje statusin e tij si lojtari më i madh i historisë, pasi theu rezistencën e Janik Sinerit me rezultatin 3-2 (3-6, 6-3, 4- 6, 6-4 dhe 6-4), pas 4 orësh e 9 minutash lojë. Një ndeshje spektakolare, ku 38-vjecari serb, i ndodhur dy herë në disavantazh setesh, arriti të përmbyste, falë një paraqitjeje fenomenale. Prania e tij në finalen e 38-të të një turneu Grand Slam, pas eliminimit të kampionit në fuqi italian, meriton një statujë në fushat e “Melbourne Park” dhe në çdo tempull të tenisit botëror. Diferenca prej 14 vitesh me Sinerin dhe 16 me Alkarazin është një barrë e rëndë për tenistët e zakonshëm, por jo për Novakun.
Një tjetër përallje maratonë dhe emocione të forta ishte gjysmëfinalja e parë e ditës së djeshme në Melburn. Spanjolli, numri 1 i botës, fitoi me rezultatin 3-2 (6-4, 7- 6, 6-7, 6-7, 7-5), në një ndeshje me tre sete të vendosura me “tie break” dhe që zgjati plot 5 orë e gjysmë. Alkaraz kaloi në avantazh të dyfishtë setesh, megjithatë tenisti gjerman reagoi fuqishëm, duke vendosur baraspeshën, me spanjollin që pati edhe probleme muskolure në setin e tretë, ndërsa koha për futjen e mjekëve e tërboi jo pak Zverevin. Më tej në setin e pestë, Alkaraz gjeti forcat dhe arriti të kalojë me sukses këtë pengesë të vështirë. Tashmë, të dielën në orën 09:30 do të jetë radha e finales së madhe Alkaraz-Xhokoviç, me tenistin serb që do të kërkojë titullin e 25-të Grand Slam dhe të 11-in në Melburn, ndërsa Karlos synon suksesin e parë në “Australian Open” dhe triumfin e shtatë të karrierës në turnetë madhorë.
I VETMI ME BILANCIN NDAJ KARLOSIT
Veterani nga Beogradi është i vetmi lojtar i “Top 10” që ka bilanc pozitiv ndaj “Carlitos”. Xhokoviç regjistron 5 fitore, kundrejt 4 sukseseve të Alkarazit në përballjet direkte. “E pashë pas ndeshjes dhe më kërkoi ndjesë që vonoi nisjen e gjysmëfinales së dytë. Unë jam njeri në moshë dhe më duhet të shkoj të fle herët”, u shpreh Xhokovic me humor pas triumfit kundër Sinerit.
