Në fazë të parë refuzoi marrëveshjen, Dinamo e pret Vorën në Tiranë

Dinamo do të zbresë të premten në fushë ku do të synojë rikthimin te fitorja. Humbja e fundit në shtëpi ndaj Egnatias, e ka lënë pas Dinamon në klasifikim ndërkohë që ndaj Vorës nuk mund të lejohen hapa fals, pasi do të ishte një tjetër goditje e madhe për skuadrën e Dajës.

Dinamos i shtohet edhe një mungesë e rëndësishme si Qefalija, i cili ka plotësuar numrin e kartonëve dhe nuk do të jetë i gatshëm për sfidën ndaj Vorës. Ndërkohë, pjesa tjetër është e plotë madje edhe Bernard Berisha pritet që të ketë më shumë minuta pasi ndaj Egnatias u aktivizua vetëm në fund, e në fakt pati impakt në lojën e Dinamos. Skuadra ka nisur menjëherë përgatitjet për sfidën e së premtes, duke mos humbur kohë ku fillimisht është analizuar humbja ndaj Egnatias, e më pas kanë nisur përgatitjet për sfidën e radhës në Superiore.

STADIUMI- Dinamo do të jetë sërish pritëse në stadiumin “Air Albania”, aty ku këtë sezon ka qenë disa herë “shtëpia” e Dinamos. Në fakt, blutë e nisën kampionatin në Elbasan e më pas u vendos që do të luante në “Selman Stërmasi”, por mesa duket situata ka ndryshuar sërish dhe blutë tashmë kanë një shtëpi ku do të presë ndeshjet e Superiores. Në fazën e parë, kur Vora ishte pritëse, i propozonte Dinamos që ndeshja të luhej në fushën e Dinamos dhe të bëhej ndërrimi kur fusha e Vorës të jetë gati, por Dinamo e refuzoi një kërkesë të tillë. Kështu, ndeshja u zhvillua në stadiumin “Arena e Demave”, aty ku Dinamo fitoi me rezultatin 0-2 dhe të njëjtën gjë synon ta bëjë edhe të premten.

STATISTIKAT- Dinamo është përballur 7 herë me skuadrën e Vorës dhe ka pasur statistika pozitive, duke fituar 5 prej tyre. Ndërkohë, 2 ndeshje të tjera i ka fituar Vora. Në ndeshjen e fundit të zhvilluar në Superiore, blutë fituan me rezultatin 0-2, teksa 11-3 është golaverazhi mes skuadrave. Dy fitoret e vetme që Vora ka marrë, ka fituar me rezultatin 1-0, ndërkohë që Dinamo nga ana tjetër e ka fitoren më të thellë me shifrat 3-0.

© BalkanWeb