S. Dukoli, 29 vjeç nga Gjirokastra dhe B.Kovaçi, 60 vjeç nga Dropulli janë dy personat që u arrestuan nga policia greke me 115 kilogram kanabis gjatë një operacioni të zhvilluar në aksin që lidh Kakavijën me Janinën.
Sipas policisë greke, dy kamionistë shqiptarë u arrestuan nën akuzën e trafikimit të lëndëve narkotike. Mësohet se Antidroga e Janinës kishte informacion për transportimin e lëndës narkotike dhe ka vëzhguar zonën, në të cilën dyshohet se trafikantët do të ngarkonin lëndën narkotike në një kamion të ngarkuar me paleta.
Kanabisi është transportuar në brendësi të kufirit grek dhe në vazhdim u ngarkua në kamion me destinacion Athinën. Policia greke bëri me dije pasditen e sotme për arrestimin e dy shqiptarëve. Mediat greke shkruanin se dy të arrestuarit, deri në kufi, e kishin çuar drogën me anë të kafshëve e më pas e kishin hipur në një kamion.
Por, u zbuluan pas një kontrolli të befasishëm nga autoritete greke. Të dy, udhëtonin me kamionë të ndryshëm dhe u kontrolluan me radhë. I pari që ishte edhe ‘testi’ ishte “i pastër”, ndërsa në tjetrin u gjetën 24 pako me marijuanë dhe në total 115 kg. gjithashtu u sekuestruan edhe katër telefona celularë dhe 1500 euro.
