Superiorja luan këtë fundjavë javën e nëntë që përmbyll fazën e parë, ndërkohë që ajo që është vënë re në fazën e parë ka të bëjë me fitoret jashtë fushave të shumë skuadrave.
Të fitosh në shtëpi është bërë e vështirë dhe shifrat e tregojnë diçka të tillë, pasi janë shtatë skuadra – 10 garojnë në Superiore – që kanë grumbulluar më shumë pikë në transferta.
“Kampionia” është Flamurtari me tetë pikë të marra. Fitore me Teutën, Partizanin dhe dy barazime të marra me Vllazninë dhe Laçin (me kurbinasit u luajt në fushën asnjanëse të Kastriotit). Në shtëpi skuadra e Shpëtim Duros ka mundur vetëm Kamzën dhe ka barazuar me Luftëtarin. Fitore brenda është edhe ajo me Lushnjen, por e arritur në Ballsh.
Pas vlonjatëve vjen Kamza, që me pikë të plota është larguar nga Gjirokastra dhe Laçi, ndërkohë që ka marrë një pikë në Fier me Lushnjen.
Bardhezinjtë e Mezanit dhe Partizani kanë marrë nga gjashtë pikë jashtë. Kurbinasit pas fitoreve me të kuqtë dhe Lushnjes, ndërsa “demat” pas triumfit me Teutën dhe Vllazninë.
Vllaznia në shtëpi njeh veç një barazim, ndërkohë që ka marrë pesë pikë jashtë. Shkodranët kanë mundur verdhejeshilët në startin e kampionatit në Fier, ndërkohë që kanë barazuar në transferta me Luftëtarin dhe Kukësin.
Teuta i është gëzuar tre pikëve në Shkodër dhe barazimi në Kamzë, ndërsa bluzinjtë e drejtuar tashmë nga Hasan Lika jashtë fushë kanë fituar në Laç si dhe kanë barazuar në Vlorë.
Pikët e marra në ndeshjet jashtë
Flamurtari 8 pikë (15 pikë)
Kamza – 7 pikë (12 pikë)
Laçi – 6 pikë (10 pikë)
Partizani – 6 pikë (11 pikë)
Vllaznia – 5 pikë (6 pikë)
Teuta – 4 pikë (7 pikë)
Luftëtari 4 pikë (5 pikë)
*Në kllapa pikët e plota
