“Fërkoji mirë nuse, se që kur erdhe ti na mbyti pisllëku..”, i thoshte Tana në rolin e vjehrrës, Marigosë, në rolin e nuses së Gjinos te komedia “Përrallë nga e kaluara”. Kjo batutë të vjen ndërmend teksa shikon fotot e kryetarit të ri të Bashkisë Sarandë, Oltion Çaçi, teksa ka marrë zorrën për të larë rrugët e qytetit herët në mëngjes.
“Orët e para të mëngjesit, në larjen e rrugëve të qytetit. Modeli i punës dhe ndryshimi duhet të fillojë nga ne”, thotë Çaçi si për të treguar se në kohën e Adrian Gurmës mbizotëronte pisllëku e zhuli.
Natyrisht që nuk mund të vihet në dyshim dëshira e Çaçit për të pasur një qytet të pastër e për të lënë gjurmë të mira në qytetin e Sarandës. Aq më tepër duke qenë në fillim të mandatit dhe i duhet lenë kohë për të treguar veten. Por shfaqje të tilla më shumë sesa spektakli në social media nuk thonë asgjë. Ai është zgjedhur kryetar bashkie, jo drejtor i komunales apo përgjegjës i pastrim-gjelbërimit në qytet.
Skena bëhet disi më komike teksa punëtorët e tjerë vështrojnë me kërshëri kryetarin e bashkisë duke përdorur zorrën e ujit, a thua se kjo është shpikja më e madhe mbi tokë. Gjoja aty krejt rastësisht gjendet edhe fotografi i bashkisë me aparat në dorë për të dokumentuar “ngjarjen” e madhe në pikë të mëngjesit.
Shumë më e pranueshme do të ishte sikur Oltion Çaçi të ishte aty për të parë nga afër nëse qyteti po gdhihej i pastër e për t’u dhënë një mesazh punonjësve të tij sesa në këtë formë duke larë disa shkallë sa për efekt fotosh. Me ç’duket Çaçi do të ketë një sens të lartë protagonizmi në publik, qoftë dhe me çmimin e shfaqjeve të tilla të tejkaluara në Shqipëri nga politikanë si Rama e Veliaj. ©argjiroja.net
