Lulzim Basha duket se e ka humbur qetësinë përballe Bujar Nishanit. Pas deklaratës së Nishanit se Basha e ka ditur që Berisha do shpallej “non grata” ndaj afroi zgjedhjet në PD, Basha ka reaguar me një fjalor të pazakonte ndaj tij, duke e quajtur sulmin të neveritshëm.
Në një postim në orët e vona të natës Basha shkruan: “E kam nisur fushatën për zgjedhjet brenda partisë me bindjen se nga kjo garë duhet të dalim më të fortë dhe më të bashkuar. Kam refuzuar reagimet që nxisin përçarje edhe pse çdo ditë ndaj meje janë hedhur sulme personale dhe politike të pavërteta dhe të padrejta. Por çdo gjë e ka një limit. Ndaj sot hedh poshtë me neveri shpifjen e ulët të Bujar Nishanit. Inati e mllefi personal e ka një limit. Por sot ai limit është kaluar, sepse lidhet me një çështje që ka prekur thellë jo një individ, jo Sali Berishën por gjithë partinë tonë. Këto shpifje të ulëta i shërbejnë vetëm atyre që bëjnë gjithçka të përçajnë Partinë Demokratike. Dhe unë këtë nuk do ta lejoj”. Por duket se Basha më shumë se sa nga Nishani është shqetësuar nga deklarata e Berishës, i cili e quajti gabim afrimin e zgjedhjeve më 13 Qershor, pa bërë ende një analizë të zgjedhjeve.
Deklarata e Berishës ishte në një vijë me Nishanin dhe kjo duket se është ajo që ka alarmuar më shumë Bashën.