Tensionohet situata te Partizani një ditë para ndeshjes ndaj Luftëtarit që mund të përcaktojë fatin e skuadrës në luftën e saj për të marrë pjesë në Ligën e Europës në sezonin e ardhshëm. Sikur të mos mjaftonte seria e rezultateve negative, te të kuqtë tani ka dalë në pah edhe në përlasje mes një titullari fiks si Bruno Telushi dhe trajnerit Klevis Dalipi.
Telushi ka qenë i pakënaqur se nuk është përzgjedhur në formacionin titullar që do të luante që nga minuta e parë kundër Luftëtarit për sfidën e nesërme. Këtë gjë, ai ia ka bërë të ditur trajnerit gjatë seancës së sotme dhe mes të dyve ka pasur një përplasje verbale.
Pas disa momenteve të tensionuara, Telushi është larguar nga fusha stërvitore, një vendim i cili mund ë ndikojë të ardhmen e tij në radhët e klubit kryeqytetas pasi mund të shoqërohet me masa disiplinore. Kjo nuk është hera e parë kur episode të tilla ndodhin te Partizani gjatë këtij sezoni. Pak muaj më parë, gjatë fazës përgatitore, një episod i ngjashëm ndodhi mes Lorenc Trashit dhe ish-trajnerit Starova.
