Në redaksinë e emisionit Fiks Fare janë ankuar një grup prej 27 nxënësish të shkollës e mesme profesionale “Thoma Papapano “në Gjirokastër. Kushtet e vështira ku ata janë të detyruar të jetojnë, por edhe temperaturat e ditëve të fundit të cilat shënojnë nën zero i kanë detyruar të rinjtë të kërkojnë zgjidhje për problemin e tyre duke trokitur në portën e Fiksit. Deri më sot të gjitha dyert kanë qenë të mbyllura për ta, duke bërë që për një kohë të gjatë të jetojnë në kushte mizerabël të një godine të ashtuquajtur konvikt.
Fiksi shkoi në Gjirokastër për të parë nga afër konviktin ku jetojnë 27 djemtë e rinj. Konvikti i shkollës se mesme profesionale ndodhet në katin e dytë të një ndërtese 3 katëshe e cila është e gjitha e amortizuar . Gazetarët hyjnë brënda dhe panorama që të shfaqet përpara syve të lë pa frymë. Dyert janë të rrënuara dhe ju vjen era kalbësirë. Edhe dritaret janë në të njëjtën gjëndje madje i ftohti ,era apo shiu futen brënda në dhomat e nxënësve. Kaldaja është e dalë jashtëpërdorimit dhe nuk fuksionon. Ndërkohë prizat janë të hequra ose gjysëm të hequra të varura nëpër mure. E vetmja mënyrë që nxënësit kanë për t’u ngrohur në këto ditë të ftohta janë disa ngrohëse që i kanë marrë nga shtëpitë e tyre, por që në darkë duhet t’i dorëzojnë një e nga një tek kujdestari. Justifikimi për këtë nga ana e përgjegjësit të konviktit është se kanë qenë vetë fëmijët që i kanë prishur dhe për këtë janë ndëshkuar. Po ku lahen këta të rinj? Në të gjithë katin ekziston vetëm një dush që shërbente për t’u larë 27 djemtë. Dushi mezi hapej e mbyllej dhe të duhej shumë fat të arrije të laheshe në të. Por sikur të mos mjaftonte kjo, bolieri i dushit është i gjithë i nxirë , me sa duket më parë kishte shpërthyer në flakë. Dyert e tualetit qëndronin vetëm në skeletin e tyre.
Fiks fare është nje program i gazetarisë investigative i cili transmetohet per publikun e gjerë nga e hëna në të premte në orën 20:10 në Top Channel.Një emision kritik dhe problemor, i cili nëpërmjet humorit dhe satirës denoncon dukuri negative të jetës sonë si korrupsioni, vjedhjet, shkeljen e ligjeve nga ana e zyrtarëve, shkeljen e të drejtave të njeriut etj.”Fiks Fare” nisi transmetimin në 19 dhjetor 2002. është i pari emision me thyerje tabuje në praktikën gazetareske.”Fiks Fare” u krijua si një domosdoshmëri e mungesës së emisioneve të këtij lloji në mediat tona, për të kontribuar sadopak në zgjedhjen e halleve dhe problemeve që përballon vendi në ketë tranzicion të gjatë. “Fiks fare” ka ngritur dhe realizuar probleme të mëdha, të cilat kanë ndikuar jo vetëm në opinionin publik shqiptar, por edhe në sektore të caktuar, duke I vënë në lëvizje dhe duke dhënë zgjidhje.”Fiks fare” sot funksionon si një institucion ku njerëzit denoncojnë të gjitha padrejtesitë që u bëhen dhe ku rrefejnë problemet e tyre./ TCh
