Trent Alexander-Arnold, është kthyer në qendër të vëmendjes në merkato. Real Madridi ka nisur përpjekjet për ta bindur që të transferohet në “Santiago Bernabeu,” duke ofruar 25 milionë euro për kartonin e tij.
Megjithatë, Liverpool ka bërë të qartë që nuk dëshiron ta humbasë lojtarin që ka dalë nga akademia e klubit dhe është bërë simbol i skuadrës.
26-vjeçari, i cili është në vitin e fundit të kontratës së tij, ka qenë një figurë kyçe për Liverpool që nga debutimi i tij me ekipin e parë në vitin 2016.
Drejtuesit e “The Reds” janë të vendosur për ta mbajtur lojtarin dhe kanë bërë një ofertë të rëndësishme, një kontratë pesëvjeçare me një pagë totale prej 93 milionë eurosh, e barasvlershme me atë që Reali është i gatshëm të paguajë për të.
Tekniku i Liverpulit, Arne Slot, ka paralajmëruar Real Madridin se përpjekja për të nënshkruar me Arnoldin nuk do të jetë aspak e lehtë.
Ai ka kujtuar përpjekjet e dështuara të Realit për të transferuar Gerrard vite më parë, një tjetër ikonë e Liverpulit që refuzoi të largohej nga klubi i tij i zemrës. Slot beson se e njëjta lidhje e thellë me klubin dhe tifozët mund të jetë faktor vendimtar për Arnoldin.
Nëse Arnold vendos të qëndrojë te Liverpuli, ai do të vazhdojë të shkruajë historinë si një prej lojtarëve më të rëndësishëm të klubit. Por, nëse Real Madridi arrin ta bindë, atëherë “Los Blancos” do të shtojnë një tjetër yll të madh në skuadrën e tyre.
Me më shumë se 330 ndeshje të luajtura për Liverpool, 20 gola të shënuar dhe 85 asiste të dhëna, Arnold është ndër mbrojtësit më të suksesshëm të gjeneratës së tij. Gjatë karrierës së tij me të kuqtë, ai ka fituar tetë trofe të rëndësishëm, përfshirë Premier Leaguen dhe Ligën e Kampionëve.
