Deputetja më e re e Partisë Demokratike, që u ul për herë të parë në Kuvend, seancën e 12 dhjetorit, Oriela Nebijaj, thotë se kryedemokrati Sali Berisha e emocion dhe është një uragan energjish. Në një prononcim për Report TV, Nebijaj thotë se Berisha është dhe do mbetet gjithmonë lideri historik i PD-së, ndërkohë që shton se nuk dëshiron të mbajë anë, pasi ka respekt edhe për Enkelejd Alibeajn e deputetët që e mbështesin atë. Ajo thotë se në Kuvend është për të gjithë ata që e kanë votuar dhe se për të ditur se kë njeh si kreun e Partisë Demokratike, do të presë vendimin përfundimtar të gjykatës.
“Nuk ka ndonjë demokrat që e pëlqen këtë moment kur 32-vjetori i themelimit gjen PD në 2 festa. I kam të gjithë kolegë, kam ndarë momente e të vështira me ta dhe në një opozitë kaq të gjatë e të mundimshme, një festë si 32 vjetori duhet të ishte festuar bashkë. Nuk është me vend të shohim pas duke e parë veten të ndarë. Nuk dua ta shoh veten si pjesë të asnjë grupi, por si pjesë të PD. Unë do të jem në parlament si e djathtë që përfaqëson të djathtën. Jam aty për qytetarët. Berisha do jetë gjithmonë në krye të PD, ai është lider historik, pavarësisht se shohim drejt së ardhmes. Kam respekt për grupin parlamentar që përfaqësohet nga Alibeaj dhe për ata që mbështesin Berishën. Jam e detyruar që t’i jap ligjit atë që meriton. Sfida e vetme e përbashkët e opozitës së madhe është të bëhet më e mira për shqiptarët. Besoj që viti që vjen do e gjejë opozitën me shumë punë të ndërtuar Zoti Berisha është uragan energjish dhe në foltore, teksa mbante syzet e errëta që i shkonin, padyshim që të emocionon. Berisha është aty ku i takon,”– tha Nebijaj.
Ori Nebijaj u betua një ditë më parë në Kuvend. Ajo zuri vendin e Grida Dumës, e cila la mandatin për të nisur një karrierë televizive. Ndërsa për Nebijajn, ndodhi e kundërta, la ekranin për politikën.
