Në muajin tetor pritet të inagurohet sheshi i ri në qendër të fshatit Dervician në Dropull. Krahas rikualifikimit të tij tërësor, elementi ndoshta më kryesor është vendosja e bustit të Kostandinos Mitsotakis, ish-kryeministrit grek i cili vizitoi Shqipërinë 33 vite më parë. Ky investim i qeverisë shqiptare ishte premtuar publikisht gjatë vizitës së kryeministrit grek Kyriakos Mitsotakis në Dropull në dhjetor 2022 nga kryeministri i Shqipërisë, Edi Rama.
Kujtojmë që Kyriakos Mitsotakis është djali i Kostandinos Mitsotakis. Edi Rama e përmendi inagurimin e bustit edhe disa ditë më parë teksa dha një intervistë për prestigjozen greke “Kathimerini”. Por marrëdhëniet Tiranë-Athinë nuk janë më si më parë për shkak të çështjes “Beleri”. Greqia ka kërcënuar vazhdimisht Shqipërinë me bllokim të integrimit në BE nëse nuk liron nga burgu kryebashkiakun e zgjedhur të Himarës, i arrestuar për blerje votash.
Kulmi arriti gjatë darkës informale në Athinë me udhëheqësit e vendeve të Ballkanit Perëndimor, kur Mitsotakis nuk i dërgoi një ftesë Edi Ramës. Në këto kushte teksa sheshi në Dervician po merr formë dita-ditës, mbetet me pikëpyetje nëse Kyriakos Mitsotakis do të vijë sërish në Shqipëri apo jo për të marrë pjesë në inagurimin e bustit të babait të tij.
Gjasat janë që jo për aq kohë sa ngërçi me Fredi Belerin do të vazhdojë. Një mbërritje e mundshme e Mitsotakis në Dervician dhe takimi i tij me Ramën do të lexohej si një tërheqje nga pozicioni i deritanishëm i Athinës. Pozicion absurd në fakt pasi raportet mes dy vendeve janë shumë herë më të rëndësishme sesa fati personal i Fredi Belerit. Megjithatë mbetet për t’u parë se si do të rrjedhin gjërat deri atëherë. Shihni më poshtë pamje nga punimet në sheshin e Dervicianit. ©argjiroja.net
