Ilir Daja do të vazhdojë të jetë trajneri i Skënderbeut të paktën edhe në sezonin e ardhshëm, me apo pa dënimin e UEFA-s. Këtë e ka konfirmuar vetë trajneri në një prononcim të dhënë për “Sport Ekspres”, ku ka sqaruar se nuk ka asnjë lloj dyshimi më për vazhdimësinë e tij.
“Parimisht kam rënë dakord dhe do të jem pjesë e Skënderbeut edhe sezonin e ardhshëm, por ka mbetur vetëm firma dhe do ta bëj realitet shumë shpejt”, tha Daja. Trajneri ka thënë vazhdimisht se do të ishte pjesë e korçarëve, por duket se së fundmi ka takuar Takajn duke gjetur akordin në planin ekonomik dhe sportiv, duke lënë pezull thjesht çështjen burokratike.
Ndërkohë, trajneri u ka dhënë fund edhe zërave të merkatos që shohin lojtarë të ndryshëm të korçarëve të bëhen pjesë e skuadrave të tjera të Superiores. “Nëse lojtarët përfliten se do shkojnë në një kampionat të huaj, nuk më shqetëson aspak. Kjo është politika e klubit për të shitur ata që shkëlqejnë. Lëvizje brenda vendit ju garantoj që nuk do të ketë asnjëherë dhe për këtë ju siguroj”, theksoi trajneri.
